АЛМАТЫ ҚАЛАСЫ ӨҢІРЛІК КОММУНИКАЦИЯЛАР ҚЫЗМЕТІ

Алматыда «Мектеп автобусы» жобасы аясында автобустар мен рейстер саны қысқартылды, соған қарамастан ата-аналардың сұранысы мен қауіпсіздік талаптарын ескере отырып оқушыларды тасымалдау жағы сақталып қалды. «Біз білім беру ұйымдарымен жұмыс істеп, мектептерден өтініш қабылдадық та, автобустардың санын қысқарту туралы шешім шығардық. Оқушыларды тасымалдауды өтінішті ескере отырып сол күйі қалдырдық», – деді Алматы қаласы Білім басқармасының басшысы Сайран Сайфеденов Алматы қаласының Өңірлік коммуникациялар қызметінде өткен брифингте.

Бұған дейін жоба аясында қаладағы 55 мектеп анықталып, 10 180 оқушы қамтылған болатын. Оларды тасымалдау үшін 181 автобус бөлініп, олар күн сайын 897 рейс жасады. Бір рейстің құны 20 орындық автобусқа 27 423 теңге (646 рейс), ал 36 орындық автобусқа 29 967 теңгедей (251 рейс) болды. Бұл мақсатқа жылына 4 млрд 164 млн теңге қажет болған.

Алайда биыл білім беру ұйымдарымен қосымша жұмыс жүргізіліп, нәтижесінде автобустар саны 49-ға қысқартылды. Көлікті алып тастауға 24 мектеп өтініш берген. Нәтижесінде қазір қаладағы 44 мектептің 7 532 оқушысы тасымалдаумен қамтылатын болды. Оларды 132 автобус жеткізеді, сөйтіп күніне 663 рейс жасайды, бұл бұрынғыдан 234 рейске аз.

Жоспар бойынша, 2025 жылы 22 мектепте 5 495 оқушыны тасымалдау үшін 92 автобус қажет болып отырған. Осыған байланысты қалалық мобильділік басқармасы жаңа автобустар сатып алуды жоспарлаған. Бұл жыл соңына дейін оқушыларды тасымалдаумен қамтуды 15 915 балаға жеткізіп, 283 автобусты пайдалануға мүмкіндік берер еді. Алайда мектептердің өтініші мен жүргізілген оңтайландыру бюджет шығындарын қысқартып, оқушыларды тасымалдау жүйесін сақтап қалып, оны ата-аналардың сұранысы мен мектептің қажеттіліктеріне сай ұйымдастыруға жол ашты.