АЛМАТЫ ҚАЛАСЫ ӨҢІРЛІК КОММУНИКАЦИЯЛАР ҚЫЗМЕТІ

Алматыда білім беру мекемелерінің қауіпсіздігі мен цифрлануын қамтамасыз етуді көздейтін үш жылдық ауқымды бағдарлама аяқталды. Бүгінгі күні қаладағы барлық мемлекеттік мектеп (216) пен балабақша (196) кешенді қауіпсіздік жүйесімен жабдықталған. Бұл жүйеге бейнебақылау, дабыл түймелері, кіріп-шығуды бақылайтын жүйелер мен өрт дабылы кіреді. Өңірлік коммуникациялар қызметінде өткен баспасөз мәслихатында қалалық Білім басқармасының басшысы Сайран Сайфеденов осылай деді.

Білім беру мекемелеріне барлығы 21 106 цифрлық бейнекамера орнатылды, оның 12 450-і мектепте, 8 656-сы балабақшада орналасқан. Барлық нысандарға бір-бірден 412 дабыл түймесі қойылған. Мектепке кіріп-шығуды басқаратын, бақылайтын жүйе енгізілсе, балабақшаларға домофон орнатылды. Сонымен қатар, әр нысанда өрт дабылы жүйесі де жұмыс істейді.

Президентіміздің «Әділетті Қазақстан: бәріміз және әрқайсымыз үшін. Қазір және әрдайым» атты сайлауалды бағдарламасын жүзеге асыру аясында, 2025 жылға қарай Алматыда жан басына қаржыландыру есебінен 75 жаңа пәндік кабинет (химия, физика, биология, STEM және робототехника) сатып алу жоспарланған. 2025 жылғы 4 тамызда 41 кабинет толық жеткізіліп, пайдалануға берілген, 24 кабинетті жеткізу жағы қолға алынды, 10 кабинет бойынша байқау рәсімдері өтіп жатыр.

Қазір Алматының 216 мектебі 1 095 мамандандырылған пәндік кабинеттермен жабдықталған, олардың 991-і жаңартылған үлгідегісі. Бұл жалпы санының 90,5%-ы деген сөз. Алматы осы  жағынан басқа өңірлердің арасында көш басында келе жатыр.

Барлық мектепр жылдам интернетпен қамтылған. Оптикалық-талшықты байланыс желісінің (ОТБЖ) арқасында 216 мектептің әрқайсысы секундына 100 Мбит жылдамдықпен желіге кіре алады. Интернет қауіпсіздігін арттыру мақсатында CGNAT (Carrier-Grade Network Address Translation) жүйесі енгізілді. Бұл жүйе тыйым салынған, террористік және басқа да қажетсіз ресурстарға кіріп-шығуды шектеуге мүмкіндік береді.

Мектептер мен балабақшаларда қауіпсіздікті, цифрландыруды және технологиялық жаңғыртуды қамтамасыз етудің кешенді тәсілі қауіпсіз және технологиялық білім беретін орта құрып жатқан Алматыны бүкіл ел бойынша алдыңғы қатардағы қалалардың біріне айналдырып отыр.