АЛМАТЫ ҚАЛАСЫ ӨҢІРЛІК КОММУНИКАЦИЯЛАР ҚЫЗМЕТІ

Алматы қаласының кәсіпкерлік және инвестициялар басқармасы мен өңірлік коммуникациялар қызметі бірлесіп ұйымдастырған пресс-тур барысында журналистерге индустриалды аймақта жаңғыртылған өндірістік қуаттар мен автокомпоненттер шығаратын технопарк жұмысы таныстырылды.

Hyundai Trans Kazakhstan жеңіл автокөліктерін өндіретін толық циклді зауыт ауқымды жаңғырту бағдарламасын аяқтады. Нәтижесінде дәнекерлеу, бояу және жинақтау цехтарына роботтандырылған учаскелер енгізіліп, бұл еңбек өнімділігін айтарлықтай арттыруға және өндірістің оқшаулау деңгейін тереңдетуге мүмкіндік берді.

«Зауытта 11 өнеркәсіптік робот орнатылып, өндірістік желілер кеңейтілді, жұмыс орындарының саны артты. 2025 жылы кәсіпорынның қызметкерлер саны 1600 адамға жетеді», – деді Hyundai Trans Kazakhstan директорының өндіріс жөніндегі орынбасары Ербол Касымканов.

Жалпы ауданы 100 мың шаршы метрді құрайтын автокомпоненттер технопаркі үш негізгі нысанды біріктіреді: автокөлік орындықтарын шығаратын зауыт, мультимедиялық жүйелер зауыты және логистикалық хаб.

Алматының Индустриалды аймағындағы автоөндіріс кластерін дамытуға салынған инвестиция көлемі 64 млрд теңгеден асты. Бұл отандық автоөнеркәсіптің тұрақты экожүйесін қалыптастыруға, жаңа жұмыс орындарын ашуға, шағын және орта бизнесті дамытуға, сондай-ақ білікті инженер мамандарды даярлауға зор серпін беруде.

Қазақстан Республикасында автоөнеркәсіпті дамыту индустрияландырудың басым бағыттарының бірі болып қала береді. Осындай жобаларды жүзеге асыру еліміздің өнеркәсіптік әлеуетін нығайтып, технологиялық ілгерілеуге жол ашады.